Ei jEijEi


Leev Lütt,

am Wocheengkhammer Poschde. Jrod rechziedich dovör es dann och de dozo passende Eier-Skandal publik jewohde. Ne Hoope kontamineehde Eier send em Handel. Met Dioxin on PCB dren. Dat es schlemm. Weil, dat Züchs es jeftich. Wies övlech donnt ons de doför zoständije Pollitekers widder mol verzälle, dat sonn kleene Meng wie se en eenem Eike es, nit schlemm wör. Se donnt äwwer verschweije, dat dat Züchs nit afbaubar es, songern sech em Balch akkemoleere deht. Bei dem Hoope von veronreenichte Läwensmeddel, die emmer widder em Ömloof send, es et mar en Zietfroch bes de Jesondheet von de Lütt irreparabel beenträchticht sinn wöhd.

Wat die janze Sach noch schlemmer mäht, es eemol, dat däm Remmels Schäng, sinnes ZeecheNRW-Verbrucherschotzminister, dat schonn zengerm letzte Mond bekannt wor, hä äwwer ehsch jetz domet en de Öffenslechkeet jejange es. Zom zwedde jehdet nit nor öm „normale“ Eikes von konvenzjonelle Eierhöff, songern vör allem sonne us bioloresche Höhnerhaldong De Ongersöhkonge von Fotter on Drenkwasser hannt kinn Opfällichkeete erjäwe. Paradoxerwies esset sojah so, dat bei benachbarte Erzeujerbedriewe die Bio-Eier verseucht wore on de angere nit.En Duisburchlieje de zwee Biobedriewe Engehammshoffon Erzeujer N° DE-0521991 meddemangs nem alde Stahl- on nem Chemiewerk.So sprichtvilldoför, dat de Veronreenijong ussem Bode kütt. De Ongersöhkonge doför send noch nit afjeschlosse. Ne wiedere Driss es, dat de Nommere von de Bedriewe met beanstandete Eier bekannt jejäwe wehde, nit äwwer de Adresse. Dä KAT-Vereen, dä die Nommere verjövt, scheevt trotz Verbrucher-Enformazjons-Jesetz de Dateschotz vör. Laut Deitermänns Wellem vom NRW-Ömweltminesteriom deht sech dat äwwer aff Septämber ändere.


Nix för onjot. Bes nähste Woch.
Üere
Charle-Manes