Schohkräm on -wichse


Leev Lütt,

Anfang des Johres es Üere Vörjänger Bätes Primos vom Job als „test“-Chefreakzjonär op dä Poste als Baas von dat Janze avangzeeht. Schön. Dat freut mech. Secher nit nor mech, songern och vill angere. Denn domet dörfden ons Schankse steije, dat Ehr als nüe Baas von de „test“-Reakzjon Üch doch mol dozo dörchrenge doht, endlech mol ne Test von Schohpotzmeddel dörchzeföhre. Waröm es dat so wechtich? Dat es daröm, weil Schoh eene von de wechtichste Artekel vom dächleche Bedarf send. Et löppt -usser em Sommer am Strand- fass kinne mieh op bläcke Föß eröm.

Wemmer Schulzens Claudia vom Deutsche Schoh-Enstetut jlöwe darf, koofe Fraulütt en heezoland sechs Paah Schöhkes pro anno. Domet komme se em Schnett op ne Vörrat von 25 Päärkes. Bei Mannslütt es dat nit so vill. Die koofe wennijer als dree Päärkes em Johr on komme domet op ne Dörschnettsbestand von mar 15 Paah. Vörsechtich hochjerechent kömmt mr op ne Bestand von jet mieh als wies dreemilljarde (!) Stöcker Schoh en Deutschland. Dat es verdammp vill.

Die mösse alle mieh odder wennijer räjelmößich jepotzt wehde. Doför bruch mr ne Hoope Schohpotzmeddel: Vörreinijongs- on Poleerböhschde, Läppkes on Döhkskes, Schohkräm us Tübches on Schohwichs us Döskes. Weil nit nor de private Schöhkes jepflächt on jepotzt wehde mösse, songern och dat janze deensleche Schohwerk von alle bondesdeutsche Uniformträjer, sollden sech de Steftong Waretest eejenslech dessen bewosst sinn, dat Tests von Schohpotzmeddel en Opjav von nazjonale Bedüdong es. Zodäm wehden alle Männer, die wie ech von ehrem Altarjeschenk zo läwenslänglechem Schohpotze verdonnert wohde send, Üch doför ewich dankbar sinn.


Nix för onjot. Bes nähste Woch.
Üere
Charle-Manes