"De öffensleche Verwendong" so heeßt e janz en schwatt jehaldenes Böhkske. Deswäje alljemeen och bekannt als "Dat Schwazzboch". Erusjejäwe wöhdet eemol pro Johr vom Bond der Stüerzahler. Letzde Mond es de 39. Oplach erscheene. Die för 2011. Ech hann mech dat Böhkske mol zo Jemöt jeföht. En verdammp entressang Lektör, die e briet Poblekom verdennt hät. Et es jot struktoreeht on öwerschaubar opjebaut. De öwersechtleche Kapiddelendeelong, dat jode Stechwohtverzeechnes on de ömfangreeche Bebelderong mäht et de Läser leecht, sech plöck en däm Böhkske zorechtzefenge. De Redaktöre Julchen Berch on Sven Ehling dörfe dat Lob entjäjenähme, dat alle Beidräch dodren en nem Stil verfasst send, de dat Läse nit langweelich wehde lösst. Janz em Jäjedeel. Ofwoll mar Fakte jescheldert wehde, send dat kinn dröje Berechte. Et es och för Laie leecht verständlich. De Artekele enthalte emmer ne jode Schoss Sarkasmos on deefere Ironie.

Et soll jedoch kee Schmonzelboch sinn. Dem Stüerzahlerbond es villmieh dodraan jeläje, dat de opjezeechte Beispeele dozo beizedrare, dat bei alle Behörde on Deensstelle, ejal of beem Bond, en de Länder odder bei de Kommune, dat Bewosstsinn för en sparsame on wehtschaffleche Verwendong von Stüerjelder jesteijert wehd. Erfreulecherwies wehden nit nor Fälle anjezeecht, bei denne dat Jeld schonn verplempert on onwidderroflech fott es, songern et wehden vörsorchlech och die Fälle opnoteeht, bei denne Verschwendonge drohe, äwwer noch afjewandt wehde könne.

Betrecke künnder dat Böhkske tirekt vom Bond der Stüerzahler e. V. Die sitze op de Schillerstroß 14 en 40237 Düsseldorf. Tellefon 991 75-0, Fax 99175-50 on eMail "info@steuerzahler-nrw.de".