letzde Donnersdach es hä hee noh Deutschland jekomme. Ratzingers Jupp. Enjelade vom Bondesdachsbaas Lammert. Zoehsch noh Berlin. Staatsempfang dörch Bondespräsedent Wulff. Dann zom Bondesdach, wo hä en Red jehalde hät. Nit en sinn Eejeschaff als Staatsowerhaup vom Vatekanstaat, songern als Owerpope von de Römesch-Kathole. Weil dat zo beförchte wor on somet ne klore Verstoß jäje de Jrondsatz de Trennong von Staat on Kerche es, hadden sech en beträchtleche Anzahl von Bondesdachsafjeordnete doför entschiede, däm Palawer fähnzebliewe. Us Feichheet, däm 16. Benedikt zo zeeje, dat nit all met emm enverstange send, hät sech Lammerts Nöppes nit entblödet, liere Sitze enfach met anger Lütt opzefölle. Först Potjomkin lösst jröße.

Owends mäht Jupp dann Schauloofe em Berliner Olympijastadiom. En Berlin-City jedoch formeeht sech de Protest jäje dä Ähzreakzjonär: Afjordnete von verschiddene Parteie, Schwule on Lesben, Messbruchsopfer von katholesche Pope on Ertrecker, Aidsopfer, Metjleeder von "IBKA" (Ketzer-Bund), vom Laiekreppke "Kerch von onge", de Humaneste on Wiedere mache optesch (met Protestplakat von Schack Tilly) on akustesch (met Protestparole) drop opmerksam, dat se sech onger nem Bröckebuer (Pontifex) wat janz angeres vörstelle als ne röckwähts jewandte Klerikalfaschist.

Nähste Däch es dat Schauloope wiederjejange: Ehsch en Thörenge, wo sech Luthers Mätes em Jrav jedrieht hät, dann em Breisjau. Ne rechtije Dialoch es nerjens opjekomme, on de Ökumäne es en noch wiedere Fähn jeröckt wohde. On wat dat all jekoss hät! Met däm Jeld (meest von de Kerchestüer) hädden ne Hoope Messbruchsopfer wennisdens finanzjell jet jeholpe wehde künne.