enzwesche esset sattsam bekannt, dat sech de Hellene onger Vörspeejelong von falsche Zahle en de €URo-Währongsonjon erinjemorelt hannt. Donoch hannt denne ehr onfähije Rejeeronge met de Messwehtschaff lostich wiederjemaht. Ejal welche Partei jrod an de Macht wor, off de sozjaldemo­kratesche PASOK odder de konservative Nüdemokrate, se hadden all nix Besseres ze donn, als ehre jeweilije Anhänger so lang ze souteneere bes de Staat bankrott wor. Domet hadden mer de Mist. Se wore Metjleed en de €-Währongsonjon. Offwoll die Satzong von däm Lade usdröcklech vörsüht, dat sonnem Staat von de angere Metjleeder nit beijespronge wehde darf, hadden die nix besseres ze donn, als plöck jenau jäje dä Passos ze verstoße. Ons Äinjie vöredraan. Dä dialekte­sche Sprong dobei wor, dat se nit de Hellene hölpe wollden, songern däm €URo. Jauweilers Pitter hät dojäje beem Verfassongsjerecht jeklacht. Hoffenslech kömmt hä domet dörch.

Weil met die Zahlonge och de jreechesche Superrenten ongerstötzt wehde, es natörlech för ons Rentneers hee nor en Erhöhong von o,99 % en 2011 möchlech. Äwwer och ons Afjeordnete mösse darwe: De Diäteerhöhong bedrächt för de nähste 2wee Johre jeweils majere 3,8 % bzw. 3,7 %!

Symptomatesch för dat hellenesche Öwel send denne ehre Taxifahrer. Weil die dörch de Liberaleseerong bei de Verjov von Taxilizenze em ehre Priveläjie förchte, donnt die jetz do alles blockeere, wat enne vör de Stoßstang kütt: Autobahne, Bröcke, Floch- on Scheffshäfe, Ponte oswosf. Wenn ech an Stell von Papandreous Schorch wör, wöhd ech die nit met de Samthängkches anfasse, songern se Mores liehre on ehre Lizenze ratzfatz entschädijongsloss entrecke. Wetten, dat söß.