selde hät mr so e Dörchenein erlävt wies bei de Enföhrong von däm nüe E10-Sprit. Da jehdet jlichziedich sowoll hen on her, rop on ronger, dronger on dröwer on zosätzlech noch vör on zoröck. Mr kann ja nit so schnell kicke, wie do nüe Meldonge op de ärme jeplochde Autofahrer zokomme. Von kinn bedeelichde Sitt kome rechziedich rechtije Enformazjone. Dat jildet sowoll för de Auto- als och för de Mineralöl-Endostrie. On och von ons Rejalt kome widderspröchleche Meldonge. Et Bröderle, Baas vom Bondeswehtschaffsminesteriom, hät jet angersch verlaute losse als Röttjens Nöppes, de eejenslech zoständige Ömweltminester. Am beste nömmste se allebeeds nit för voll.

Dann meschden sech noch all de Verbände en, die sech anjesproche föhlden, on dohden ehre Senf dobei. De ADAC sahden jet angeres als de Bond för Ömwelt on Natorschotz. Öm dat Chaos ze vervollständije, kome och noch ne Hoope Meldonge von verschiddene Behörde, die besahden, dat se vörsechtshalwer en ehr Äutokes ki E10 erenschödde wehde. Weil mi eejene Nuckelpinne, e ahl Erbelekörfke us 1982, och dovon betroffe sinn künnt, hann ech Wenterkorns Mätes bei VW en Wolfsburch anjerope. Hä wor nit do, äwwer sinne Adlatos meenden, do künnt ech bedenkeloss E10 erinschödde. Jampitter Held, Meester bei de VW-Nidderlossong Moll en Hähdt, jov äwwer zo bedenke, dat die Öko-Plörre de Iseleerong vom Tank anknabbere künnt – on de Liedonge och.

Die jähn em Vörderjrond jeschowene Ömweltarjumente wehden eemol dodörch jemendert, datte met E10 ne höhdere Verbruch häs als mem normale Super. On zom angere esset och jrod nit ömweltfröndlech, wenn för de Erzeujong von die Öko-Plörre riesije Wälder jerodet wehde mösse.