et es e forchbar Drama, von dem Japan jetz betroffe es. De jröttste anzenämmende Onfall es passeeht: Kähnschmelz em nem Atomkraffwerk! En Fukushima Daiichi send alle Meiler zerstört. Mr leidet met de ärme Bevölkerong, meut so jähn hölpe, weeß äwwer nit wie. De janze Welt es betroffe. Och ons Rejalt. Mr kann janit so schnell kicke, wie de Schwatt-Jäle ehr Meenong en Sache Atompolletik ängere. De Ussecht op ne Wähler-GAU bei de nähste Landdachswahle lösst bei denne de Arsch so rechtich op Jrondies jonn. Angs essen chrest-liberale Seele op.

Mer künne ons noch jot erennere, wies ons Rejalt onger Merkel on Westerwelle em letzde Herws de Verlängerong von de Loofziede för Atomkraffwerke dörch de Bondesdach jepaukt hät. On wie se jetrickst hannt, öm de Bondesrat, wo se kinn Miehheet hadden, drusse vör ze losse. On wie se et bellijend en Koof jenomme hannt, dat betroffene Bondesländer dojäje klare. Wie se ehre eejene Ömweltminester Röttjen, dä dojäje war, desavoueeht hannt. De janze Arrojanz der Macht wohd opjebode, öm sech de Atomendostrie jeneicht ze halde. Jetz jereere se sech jröner als de Jröne.

Atom-Moratoriom för dree Mond. Et soll nohjedacht wehde, of se em Herws rechtich nohjedacht hadden. Widderlech anzesünn, wie sech de konservative Bajasch nu drieht on wendet. Totale Rolle röckwähts: Sibbe Meiler solle janz vom Netz jenomme wehde. Ohne Bondesdachsbeschloss. Ech ben dovon öwerzeucht, dat de Wähler sonn Manöwer rechtich enordne. Als Ehschde wöhd woll Stefan Mappus, Baden-Wörttemberchs böwerste Atomlobbyjest, eene vör de Mapp kreeje. Zomol dä schonn met sinn onselije Maßnohme zo Stuttjaht 21 ne Hoope Dreck op'm Kervholz hät.