so wies bowe stung et am Mondach des Woch op de Titelsitt vom "Express". Treffender hätt och ech et nit usdröcke könne, ofwoll dä janze onappetitleche Driss jo eejenslech noch vill schlemmer es. Denn mr süht hee mar de Spetz vom Iesberch. En Eenzelfäll hätt HRE-Baas Manuela Better de Haupmackedore von de zwangsverstaatlechte Hypo Real Estate Bank sojar bes zo een Milljon € en de Täsche jesteckt! Als Erfolchsprämije! För 2009! Dat Johr, wo se met ehre Lade ne Verlost von mieh als 2,2 Milljarde € jemaht hannt! On dat, wo se zodäm jrad met zosätzleche 40 Milljarde ernüt vor de Pleite jerettet wohde. Wat de Jesampsomm för de Rettong op 150 Milljarde € brengt.

Wat de Skandal noch jrötter mäht, es, dat dat all met Wesse von Üch als Penunseminester on de Zostemmong von Üerem SoFFin-Jremiom erfolcht es. Wenn Ehr zor Rääschfähdijong saht, "dat Ehr met de Sonderverjötonge verdeensvolle Metärbieder halde wollt, domet die nit angerschwohen afwandere döhden", kann ech mech nor am Kopp packe on versöhke, mech enzetrechtere, dat Ehr dat nit ähns mennt, songern dat dat mar Ironie von Üch es. Denn dömmer jehts woll nömmer. Ki eenzich Jeldenstitot wöhd sonn Niete öwerhaups anfasse. Noch niddens met de Kniepzang. On wenn do werklech e paah Jode dronger wore, so send die soweso schonn längs wiet wiet fott.

HypoReal es wahrlech e Stöck ussem Tollhuus. Ech kann et emmer noch nit fasse, wie Ehr on et Merkels Aindjie sech von Ackermäns Jüppke met dem Arjument "de HypoReal sei systemrelevant för dat deutsche Finanzwäse" öwer de Desch hat trecke losse. Wat hä domet werklech meende, es, dat de HypoReal systemrelevant sei för dat Finanzwäse von sinn Bank. För de Deutsche Bank - nit för Deutschland! Hoffenslech sidder en de Lach, de Bonoszahlonge för 2010 noch ze stoppe!