am Jertrudisplatz jövdet ne Lade för Backware. Bäckerei Hinkel & Puppe. Die kreeje ehr Plörre –odder zomennes ne jroße Deel dovon– von Hinkels Jupp us de Carlstadt. Do en Eller verkoofe die och ehr eejene Brötches. Die koste 29 Cent et Stöck. Zor Ziet send die em Anjebot. Fönf Stöck dovon koste mar 99 Cent. Op minn Frach, wat dann veer dovon koste, rechent dat Mädche em Lade plöck vör: „2wee Brötche koste 58 Cent; dree Brötche 87 Cent on veer Brötche koste dann eene €URo 16.“

Drop ech: „Hä, wie dat dann? Wieso send veer Brötche düerer als wies fönf Stöck?“ „Jo“, säht dat Mädche, „weil fönf em Anjebot send!“ „Jot, wenn ech nu fönf Brötche koofe donn on jäv Üch eens dovon zoröck, wat koss mech dat dann?“ „99 Cent!“ „Jot, on wat mahder dann met dem zoröckjejowene Brötche?“ „Dat kritt dann de Nähste.“

Nu de Frach an Hinkels Jupp als Rejionalowermeester von de Bäckerennong on an Brendjens Sijrid als ampleche Fachfrau för Läwensmeddelöwerwachong: „Darf mr dat? Odder mösse onverpackte Läwensmeddel, die zoröckjejowe wohde send, entsorcht wehde?“ Ech ben secher, dat Ehr Fachlütt dat erus kritt. Siddens so jot on doht mech dann kohz Bescheed. Entswäder per eMail, Fax odder Breefke. Wenner en Röckfrach hat, künnder mech och tellefonesch anbemmele. Schöne Dank em Vörus!