em Freiloftbereech wor letzt Wocheengk rechtich jet loss. Alle Freiloftfäns kome op ehr Koste. Dat feng mem Wäder an. Öwerall nor Sonnesching. Ferijebejenn. De Strandbäder voll. En Lörick zosätzlech noch Freiloftkinno. Am Burchplatz en de Aldestadt wor kosteloss Rudeljlotze anjesaht. Nit för Foßball. Do nämme die en Düsseldorf emmer Kohle för. Enä, et jov en Opernjala för se all!

Entspannong pur beem Besöhk von nem Bierjahde. Janz besongersch op de Kasematte. Weil, von do hässe zosätzlech ne schöne Bleck op de Jrote Kermes. On wennste dann Lost häs, för öm die ze besöhke, bruchste nit wiet römzeloope, songern kunnts von do us tirekt met de Pont öwersetze. Usserdäm ne Hoope mieh Veranstaltonge: Flühmahts, Stadtföhronge on –rondjäng, Böötchesfahde, Zerkus on Partys. Besongersch ze erwähne dat jelongene Sommerfess vom Kleenjahdevereen Eller: Freie Entrett. Jönstich Esse on Drenke. Volles Projramm: Musikkreppke,  Tambourkorps on Zauberkönsler. Höhepönkt: En Travestieschau vom Feenste. On de Düssel-Elfe, et Männerballett vom Jahdevereen.

Dann hadden sech och noch dree Milljone Dölle op de A 40 vererrt. Die fande dat Jedrängs on de Klamauk do toll. No ja, wenn dat denne ehre Vörstellong von Erholong es, solle se do ehre Spaß an de Freud hann. För mech wör dat nix.