hütt es sonne rechtije Autodach. Zoehsch eemol Daimler met Mercedes on Smart. Die hannt em letzde Johr kräftich Verloste enjefahre on send em Minus jelandet. Dann hammer dat Kreppke Rennoh/Nissan. Die hannt och Verloste enjefahre on send och em Minus jelandet. Do wolle se all widder erus. "Äwwer wie?", öwerlahden Didi Zetsche on Kalli Ghons. "Lommer ons zosammedonn, denn Minus mol Minus erjövt jo Plus", so die 2 Entellenzknubbel zo ehr Melchmädcherechnong.

Dann es do de Jeneral Motors-Dauter Opel. Die es och em Minus. "Öm do widder ruszekomme, wöret am Beste", so Opel-Baas Nick Reilly, "wenn ons de Polletik dobei suteneere wöhd". Weil en NRW demnähs Wahle send, es hä plöck zo Rüttjers Jürjen jelatscht, on hät däm belabert. On weil dä de Stemme von de Opelaner hann well, hät hä prompt Zostemmong sichnaleseeht.

Dat es och en Melchmädcherechnong. An angere Stell künnt mer met dem Jeld bessere Duerjobs schaffe. Wenn de Staat Opel Jeld jäwe wöhd, jeng dat zo Laste von de angere Autoproduzente. Et es zodäm mieh als wohrschinglich, dat ne jroße Deel von däm Jeld noh Amerika affleeße deht – etwa en Form von erjenswelche dubijose Lizenzjeböhre odder sojet. Jürjen zom Metschriewe: "Et wehde enfach mieh Autos prodozeeht als jebrucht wehde, on Autos koofe kinn Autos".