Priestermacher op de Steenstroß


Leev Lütt,

vom 20. Jannewar des Johr bes zom 12. Mähz löppt en de Komödije op de Steenstroß dat Zweepersonnestöck "De Priestermacher". Vom amrikanesche Autor Bill C. Glisermann/Davis. De Rolle hannt Freitags Thomas on Lückes Constantin öwernomme. Dat Böhnebeld es von Tillys Jack. On Fuschls Helmuth, Prenzepal vom Thiater, es de Reschissör von däm Stöck. So wies och 2001 en de Vörstellonge met Fuchsberjers Bläcky on Breuers Pascal.

Dat Stöck handelt von nem alde, jestangene Jemeendepaster, dä ne jonge Seminarest zom Priestertom föhre soll. Dobei prallt de en lange Jöhr erworbene Prachmatesmos von dem alde Deener Joddes op de idejalestesche Vörstellonge von dem jonge Priesterschöler. Ofwoll et öwerus verjnöchlech es, dem Ustausch der jewellijen Arjumente zozehöre on zozesenn, kammer weeß Jott nit sare, dat et sech bei dem Stöck mar öm en zimple Komödije handele deht.

Enä, je länger de Handlong duert, desto mieh wöhd dörch die Tispetazjone, die die zwee föhre, offebar, wat ons de Autor met dem Stöck eejenslech verkasematuckele well. Mr es jespannt, wä sech letzlech met sinn Arjumente dörchsetze wehd. Odder off se sech op ne Kompromess eenije könne. De Lösong kömmt jet öwerraschend. Mieh sei hee nit verrode, öm nit vöraff de Spannong ruszenämme. Joht hen. Et lonnt sech.


Nix för onjot. Bes nähste Woch.
Üere
Charle-Manes