en Deutschland hannt de Schwobe de Rof, sparsam ze sinn. Eene von denne es Schleckers Tünn. Dä es so schrabbich, dat et schonn kriminell es. So send hä on sinn Frau Christa 1998 och wäjens Bedrochs zom Nohdeel von sinn Ärbieder zo je zehn Mond Knast on en Jeldstrof von een Milljon verknackt wohde.

Jetz es hä als widder em Fokus von de Justiz. Weil hä sinn Ärbiederinne us dem normale Lohnverhältnes rusjedrängt on et dann öwer en met em verbandelte Leihärbiedsferma zo jerengere Bezöch widder enjestellt hät. Dat funkzjoneehden eso: Ehschmol wohd en Minijewerkschaff opjedonn, die em jeneicht wor. Met die wohd dann ne Tarifverdrach usjekongelt met Bedengonge, die för die Leihärbiedsferma jönstich wore. Domet kunnt dat Personal dann entsprechend römjeekelt wehde.

Weil dat Berliner Landesärbiedsjerecht letzde Mond dem widdersproche hät, dat die Tarifpartner öwerhaups tariffähich seie, send de Verdräch onjöldich. Wenn dat Bondesärbiedsjerecht en Erfort dat och so entscheede deht, dann moss nohjezallt wehde. On dat nit nor von de Leihärbiedsferma, die dann secher ratzfatz pleite mäht, songern per Dörchjreffshaftong och vom leewe Tünn selvs. Dat wöhd düer, denn näwer de Metärbieder wolle secher och de Sozjalkasse on de Finanzämpter entsprechende Nohzahlonge hann.