Alle Krütze mösse fott


Leev Lütt,

met dem "Kruzefix-Urteel" hät de Europäesche Jerechshoff för Minscherääschs en Stroßburch (EGMR) jestere e bemerkenswähdes Urteel jefällt. Woröm jeng et? Do hät die us Finnland stammende Mama Soile Lautsi, die ehr zwee Blare 2001 en Albano Terme en en italjenesche Scholl jescheckt hät, verlangt, dat de Kruzefixe en de Klassezemmere afjehängt wehde. Äwwer do hät se de Rechnong ohne die met de vatikanesche Klerikalfescheste verböndete italjenesche Rejalt jemaht. Die sahden enfach "Enä"!

Wat mäht de strietbare Motter drop? Se klacht dojäje. Äwwer och do hät se de Rechnong ohne de katholesche Rechterbajasch jemaht. Alle Enstanze bes zom böwerschde Jerecht hannt ehre Andräch afjwiese. Anno 2006. Wat nu? För Soile kinn Froch. Se deht wieder klare. Beem EGMR. On dä hät ehr jestere eenstemmich Reiht jejowe on de italjenesche Staat zo 5.000 € Schadeersatz verdonnert.

För alle Kathole wor dat europawiet ne schlemmere Schlach als wie wenn denne ehre Inri selfs vom Krütz erafjesteeje on zo de Blauköpp konverteeht wör. Stonnsfoß hät de italjenesche Owerhallodri Silvio Berlusconi erkliert, dat hä dojäje Berofong enläje losse wöhd. Dat es möchlech on och jot so. Wenn nämmech dat Urteel dann endjöldich sinn wöhd, müsse de Krützkes öwerall afjehange wehde. Och die en Bayern.


Nix för onjot. Bes nähste Woch.
Uere
Charle-Manes