am Sonndach wore Wahle. Landdachswahle em Saarland, Thörenge on Sachse. Usserdäm Kommenalwahle en NRW. Enzwesche leeje de Erjävnesse vör. Dobei wor vörher schonn klor: Et jövt nor Siejer. Em Schönrechne och von de mickrichste Erjävnesse entweggelden de Parteie ne Enfallsreechdom, de Sinnesjliche söhkt. Se dont sech dobei so öwertrompe, dat mr sech nor en de Kopp fasse kann öwer de dialektesche Spröng, die die sech enfalle losse.

De Wahlarethmetik jipfelt dodren, dat, wenn nor 2wee Kandedate do wore, wie bei manche Wahle för et Börjermeesteramp, de Verleerer konstateeht, dat hä bei de Wahl ne hervörrarende zwedde Platz erreecht hät, während sinne Jächner nor Vörletzde jewohde es. Se entblöde sech och nit, Äppel met Biere ze verjleeche. Verloste wehde schonn zom Siech, wenn en angere Parteie höhdere Verloste hannt. Odder wenn eejene Verloste en fröhere Ziede noch jrößer wore.

Wenn de Polwerdamp sech dann jeläht hät, kömmt de Zietponkt för Rejalpolitek. Dann stelle manche Strateje fess, datse vörher et Mull zo wiet opjeresse hadden als se sahden, so wöhden op kinne Fall met die odder die Bajuffe e Böndnes enjonn. Spädesdens dann liere se die normative Kraft vom Faktesche kenne on wehde zom Ömfaller wies weiland Ritterkrützdräjer Erich Mende odder Ypsilantis Drea.