de Redewendong "Tacheles rede" kömmt us dem Jiddesche. Se deht so vill bedüde wies "jemand onverblömt de Meenong deue", "onjeschmenkt on klor de Wohrheet sare", "heikle Theme ohne Schönrederei on diplometesche Röcksechtsnohm anspreche on op et Tapet brenge", "jemand ohne Zoröckhaldong dr Deskamp läse" on so wieder en die Aht.

Leider Joddes es die Jov, Tacheles ze rede, bei vill Politiker on Spetzemänädscher verlore jejange. Wenn do ne heeße Brei es, eiere de miehschde von denne met enhaltsliere Wohthölse drömeröm. Ömso schönder esset, wenn eene wie weiland Luthers Mätes dem Volk op et Mull schaut on och so sprecht. So wie Wickerts Uli et met sinnem Boch säht "Jauner moss mr och Jauner nenne". Wenn ons Bondeskanzlerin onjeschmenkt Tacheles rede deht – ejal of met de Chinese, met Putin odder mem XVI. Bennedikt, so kammer doför dr Hot trecke. On wenn Barrack Obama de amrikanesche Bankmänädscher met ehre Bonuszahlonge als "onverschammte Lompe" bezeechne deht, so es dat en klore Sproch, die malk verstott.

"Wie", so froch ech Üch beeds nu, "sollmer die nenne, die em NRW-Landdach trotz öppijer Versorjong von fass 10.000 €URo an Diäte em Mond öwer mößije Bezahlong morre on en Opstockong fordere"? Vill Lütt fende "Drecksäck" wör do de passende Usdrock. Wat mennt Ehr?