Owendesse för Eene


Leev Lütt,

et es jeschafft. Dat Johr 2008 es fass eröm. De Zeeche send onöwersennbar. De ehschde Weihnatsbööm stonn schonn afjewrackt op de Stroße eröm. Em Fähnsiehe reeht sech eene Johresröckbleck am angere. Och de Ziedonge on Zietschrefte send voll dovon. On zenger vörjestere es et nit ze öwerhöre, dat de Kracher- on Böllerverkoof anjeloope es. E paah Lackels probeere zengerdäm fleeßich us, of die öwerhaups funkzjoneere.

Spädesdens wenn op alle Kanäl "Owendesse för Eene" löppt, weeß malk, dat Silvester es. Am Deener Jämes on sinnem Frollein Zoffie kütt keene vörbei. Et es met Afstand dat miestjespellde Stöck em Fähnkicke weltwiet. Jeschreewe hät et 1924 de britesche Schreftsteller Lauri Wylie. Zoehsch wohd et mar op Böhne opjeföhrt. De Fähnsieh-Versjon, die mer hee jetz emmer ze senn kreeje, hät dr NDR opjezeechent. Se wohd et ehschte Mol 1963 usjestrohlt. Von Frankenfelds Pitter.

"Owendesse för Eene" es zom Kultstöck jewohde. Enzwesche wöhd dat odder angere Versjone dovon räjelmäßich och en angere Länder för zo Silvester usjestrahlt. On et jövt sojar Mondaht-Versjone dovon. En schöne Tradezjon, op die ech mech jedes Johr nü freue donn. Äweso wies op "Dä Silvesterpunch" met Schuberts Drickes als Ekel Afred Tetzlaff us de Reih "En Hähz on en Seel" von Menges Wolfjang.


Nix för onjot. Bes nähst Johr
Üere
Charle-Manes