dat de mieschde Fähnsiehprojramme bedresse send, kann enzwesche als Axjom anjenomme wehde. Ofwoll de doför Verantwohtleche dat off jenoch von alle Sidde ze höre on läse kreeje, scheent die dat nit ze störe. Fönfmol alleen hann ech dat hee en minn Kolomne beklacht. Mar eemol hät dr WDR drop jeantwohdt on Besserong jelobt. Dat woret äwwer och. Passeeht es nix. Die sitze dat us on dont sech selfs beweihröhkere wie jot se wöre.

Vörletzde Schabbes äwwer hät Reich-Ranickis Marcel denne mol so rechtich en de Zupp jespockt. Meddemang en son Selfsbeweihröhkerongssendong hät hä denne vor loopende Kameras ehre Dress öm de Ohre jehaue on jesaht, dat dat Mest on Blödsenn wör. Pafdich, dat hät jesesse! So wies de Betroffene sech dodrop jekrömmt on jewonde hant, kammer nor konstateere, et wor ne Volltreffer. Zostemmong von fass alle Sidde. On Heidenreichs Elke hät met ehr Bemerkong, dat mer sech schamme mösst, för sonne Sender ze ärbiede, et Tüppelche op et i jesetzt. Schapo!