de Jrönd doför, dat dä Oktober 2008 ne "schwatte" es, lieje nit en de Nator, songern em Finanzwäse. So wies beem Schwatte Oktober 1929. Do send de amrikanesche Börse zosammejekracht, wat en jrotte Weltwehtschaffskris usjelösst hät. Jetz datselve. Dat riesije Finanzkonstrukt, dat von jierije Bankmänädscher opjeblose wohde es, hät sech als ne enhaltsliere Loftsack entpoppt. Wie konnt dat passeere? Wä esset enschold?

Do jöwet zwee Kreppkes, die doför verantwohtlech send. Onfähije Politeker on de jeldjierije Raffzäng von de Banke! An ehschte Stell steht do dä Bushkriejer Schorch Walker. Öm däm sinne onsennije on düüre Nahostkreeje ze finanzeere, mosst Jrönspans Allän de amrikanesche Zense so wiet senke, dat en Folje dovon och de Hypothekezense Rekorddeefde erriechten. De Banke hant dat sofott usjenotzt on praktesch jedem Hawenix e Darliehe jejäwe. Dat konnt op Duer nit jot jonn. On so es denn de Blos foljerechtich och jeplatz.

Wenn hee bei ons Opsechtsrotsposte bei staatleche Kreditenstitute vör allem als Versorjongsbahnhöff för verdennte Parteipoliteker jenotzt wehde, moss mer sech nit wondere, wenn die Schose dr Bach rongerjeht. Weil die hant kinn Ahnong vom Bankwäse, songern send mar am Fölle von de eejene Täsch entresseht: Onfähich on jeldjierich zojlich.