et es völlich lejitim, wenn Ehr als Melchbuere-Baas mieh Jeld för de Melch hann wollt. Dat jowet schonn fröher. Äwwer do wor dem Buere-Verband noch klor, dat och bei der Melch de Preisbeldong däm Jesetz von Anjebot on Nohfroch folcht. So dohden de Buere en de Fuffzijer Jöhr vom letzde Johrhondert janz enfach öwer ne erhöhde Melch-Afsatz för höhdere Preis sorjen. Met däm jreffije Slogan "Melch mäht möde Männer monter" hat dat domols och jot jeklapp. Zengerdäm hät sech an däm Jesetz nix jeängert. Janz em Jäjedeel. De Buere hadden dat Jesetz so verennerlecht, dat sech dodrus sojah dr sojenannte Ferkeszyklos entweggelt hät.

Die Moßnohme, zo die Ehr jetz Üer Metjleeder opjerope hat, för öm höhdere Melch-Preis dörchzesetze, wehde deswäje och mar bejrenzt zom Erfolch föhre. Domet doht Ehr Üch vör allem selvs schade. För fottjeschöddete Melch kridder janix. Wenn et Kartellamp odder dr Wettbewervs-Kommissar us Brössel Üch e deck Boßjeld opbromme deht, wöhdet och nit besser. On wenn Staatsanwaltschafte de Blockademoßnohme von Üer Metjleeder als Nödijong verfolje donn, hadder ehsch so rechtich met Rosinge jehandelt. Schonn De alde Römer sahden för sojet: "Quidquid agis, prudenter agas et respice finem". Dat heeßt, datste vörher öwerläje solls, wat bei son Akzjon ruskütt.