Besöhk vom Dalai Lama


Leeve Kon-dun!

schön, dat Ehr letzde Woch en Üer Eejeschaff als Dalai Lama on jeesleches Owerhaup von de tibetesche Buddheste mol widder zo Besöhk en de Bondesrepoblek wort. Wennijer schön, wie sech e paah von ons poletesche Vörturner jedrieht on jewonde hant, för öm Üer Heelichkeet nit empfange ze mösse. Ofwoll Ehr noch niddens als Baas von de tibetesche Exilrejierong hee wort, hadden se all Muffesause vör de chinesesche Rejalt, die emmer lanceere deht, dat sojet de Betreckonge zo enne dröwe wöhd. On dat, ofwoll mr janz jenau weeß, dat jrad de chinesesche Bonze en poncto Minscherääsch Engnorante par exzellongs send.

Sojah die, die sech selfs als Humaneste bezeechne, kniepe vörsechtshalwer dr Arsch so fess zo, dat mr Angs hann moss, dat se platze. Dat fängt bowe bei onsere Bondespräsidente-Darsteller Hotte Köhlers an. Et jeht wieder met fass de janze Bondesrejalt. Vöredraan Ussemenester Steinmeier. Äwwer dä deht sinn poletesche Kotaus noh rähts on lenks soweso als höchste Form von de jrote Staatskons betrachte. On wat soll ech zo ne Kähl wie Becks Kurtchen saren, dä dat Treffe met Wieczorek-Zeuls Heidi als nit mieh röckjängich ze machende Scheiß bezeechnet? Ech donn mech schamme för dat Jesöms on hoff, dat denne erjenswann doch nohmol de höhdere Erkenntnes zodeel wöhd.


Nix för onjot. Bes nähste Woch
Üere
Charle-Manes