De 0180er-Vörwahle


Leev Lütt,

fröher wore 0180er-Nommere bei Fähnjespräche jönstijer als de normale Vörwahle. Enzwesche send de Tellefonkoste kräftech jefalle. Zom angere tellefoneere vill Lütt zom Pauschaltarif. Deswäje künnte de 0180er-Nommere eejenslech fottfalle, zomol de Anjeropene dodraan nix verdeene. Mar de Tellekom profiteeht dovon. Weil mr äwwer de Lütt öwer 0180er-Nommere so schön en de Callcenters kritt, wehde ons die noch en Ziet erhalde bliewe.

Wenn Buttjereits Fritze von de Pressestell bei dr Poss dozo säht, dat ehre Pröfonge erjäwe hant, dat de mieschde Konde von denne domet zofredde send, deht mech dat an Churchills "Jlöv kinn Statestik, dieste nit selvs jefälscht häs" erennere. Wenn hä fottfäht, dat de 0180er-Nommere och deswäje beibehalte wehde, domet de Metärbieder op de eenzelne Deenststelle nit dörch Anröp von Konde jestört wehde, deht dat bedüde "Mr künnt so schön ärbiede, wenn bloss de Konde nit wöre". Op "www.tk-anbieter.de" künnt Ehr äwwer för vill 0180er-Nommere de normale Vörwahle fenge.


Nix för onjot. Bes nähste Woch
Üere
Charle-Manes