En usjemahte Ferkeserei


Leev Lütt,

de pahlamentaresche Jeschäffsföhrer von de Chress- on de Sozjaldemokröte, Röttjens Nöppes on Olli Scholz hant en onhellije Allejanz ne Jesetzentworf enjebraht, för öm de Diäte wedder kräftich ze erhöhe. Se entblöde sech zodäm nit, dat met alle möchleche on onmöchleche Arjumente ze bejrönde. Äwwer alles, wat se do opföhre, kammer jetrost onger "Tarne on Döösche, Vernäwelong, Loch on Bedroch" subsumeere.

Näwer de Diäte bellije die sech noch ne Pöngel mieh an Wolltate zo. Onger angerem: Bes zo 13.660 € em Mond för ehre Metärbieder on en stüerfreie Kostepauschal von zor Ziet 3.720 €, die jedes Johr automatesch erhöht wöhd. Ofwoll de Kostepauschal verfassongswidrich es, künne Börjer dojäje nit beem Bondesverfassongsjerecht klare, weil de Afjeordnete on de Rejalt dat Rääsch dozo, exklusev för sech vörbehalde hant. Die janze Ferkeserei kann sech nor dann bessere, wenn dat Trabaljepack ehr Erhöhonge mar alleen an de Rente koppele wöhd.


Nix för onjot. Bes nähste Woch
Üere
Charle-Manes