Verbruhker-Test för de Katz


Leev Lütt,

verjleechende Waretests, wie se von en janz Reih von Enstituzjone dörchjeföht wehde, send för potenzjelle Kööfer en jroße Hölp, för öm vörher ruszekrieje, of ne bestemmte Sach odder Deenstleestong, die mr sech jönne well, jot es odder mar Driss, wo mr besser de Fenger von lösst. Die teste so zeemlech alles, wat mr för Huus on Jahde brucht. De janze technesche Plürre för Ongerhaldong, Kommenekazjon on KommPuter wehde jepröft. Och vör Afföhrmeddel, Klopapier, Pariser osw. send die nit fies. On et es nit uszeschleeße, dat demnähs och Puffs jetestet wehde.

Letzdens hät Trybas Schorch von de Verbruhker-Zentral NRW 20 Rädches-Werkstätte jetestet on rusjefonge, dat 18 dovon hudele! Dat hät hä dann och jroß rusposaunt, doch de Name on Adresse von de jetestete Lädches deht hä nit sare. Wat notzt mech also sonne Test, wenn ech trotzdäm nit weeß, wohen met mi Filuzepe, wenn do jet draan es. So kammer och Stüerjelder zom Finster russchmeeße.


Nix för onjot. Bes nähste Woch
Üere
Charle-Manes