met jroße Freud hann ech zor Kenntnes jenomme, dat Ehr, nohdäm Ehr de böwerste Befählsjewalt en Üere Lade öwernomme hat, letzde Mond de Vorhöll afjeschafft hat. Jetz bruche de Seelches von Blare, die jestorwe send, bevör se jedöft wehde kunnte, sowie die von Kenger, die ehsch jahnit zor Welt komme dorfte, endlech nit mieh en de Vorhöll. On dat jildet jo och för die Lütt us angere Relejone, die e Läwe jeföht hadden wie et Üere Härjott hann well. Dat es jot so.

Äwwer wat passeeht nu met de janze onjedöfde Seele? Et jeht secher nit, die jetz enfach en de Höll ze schecke. On wäjens de Liehr von de Erwsönd es et jenau so schwierich, die enfach en dr Hemmel ze verfrachte. Et sei denn, Ehr doht och noch de Erwsönd afschaffe. Weil Ehr domet äwwer ne Stötzbalke us Üerem Huus erusnämme wöhdt, wöhd dat zwor Üere janze Vereen ärch ent Waggele brenge, äwwer et wör secher em Senn von Üere Baas on och vom Junjor-Chef. Nor Mot also!