bes zom 31. Mai mösse de Enkommestüererklieronge afjejowe wehde. Doför ne wechtije Henwies: Och Ennohme us illejale Tätichkeete send ze verstüere! Wennste för zom Beispill et sonndachs emmer en de Kerch jehs on dech do, wenn de Klengelsbüdel erömjereecht wöhd, och jet rusnämme dehs, send dat "Sonstije Enkönft". Die mösse en Zeil 4 op dr "Anlach SO zor Enkommestüererklärong" opjeföhrt wehde.

Do bruchs kinn Angs ze hann, dat dech dat Finanzamp an de Pastor verrode deht. Dat dörfe die nit. Janz em Jäjedeel. Weilste dat jo rejelmäßich mähs, kannste alle Koste, die dech dodörch entstonn (Fahde zor Kerch osw.), als Werbongskoste stüermendernd afsetze (en Zeil 6). Dat Finanzamp säht nämmech janz klor: "Werbongskoste send alle Koste zom Erwerb, Erhalt on Secherong von Ennohme". On wennste werklech mol jet en de Klengelsbüdel erindonn mosst, so kannste dat als "Zowendong för kerchleche Zwecke" (en Zeil 81 Enkommestüererklierong) afsetze.