kohz vör Poschde hät Meisners Jochen, dä em Momang en Kölle de Job als Rodkäppche mäht, widder so rechtich donäwerjetickt. Weil en Lohmar de Kerch von de Kathole repareeht wöhd, hant de Blauköpp denne jestattet, de Joddesdeenste en ehr Kerch ze make. Dat dohden so jot klappe, dat de Kathole on de Blauköpp beschlosse hadden, zo Poschde ne jemeensame Wohtjoddesdeenst afzehalde. Donoh wollden se beeds en Ostermess noh ehre eejene Ritus make.

Äwwer do hant die de Rechnong ohne dat Rodkäppche jemaht. Dä fohr dozwesche on hät sinn Schöpkes met Bletz on Donner zor Räsong jerope. Wo köme mr denn do hen - sinn leewe Kathole met de fiese Blauköpp zosamme? Kohz on jot – hä häddet verbode. On weil die Kathole och eenst en de Hemmel komme wolle, hant se sech woll odder öwel jeföcht. Ech kann nor hoffe, dat ons Rodkäppche von so e Dörchenein verschonnt blifft, on dat hä dereenst nit en de jemeschde Höll kütt, songern en en reen katholesche.